मुंबई
महाराष्ट्र सरकारमधील मंत्री मंगल प्रभात लोधा यांनी जैन समाजाचा अल्पसंख्याक दर्जा रद्द करण्याबाबत केलेल्या विधानामुळे मोठा राजकीय आणि सामाजिक वाद निर्माण झाला आहे. कर्नाटकचे जैन कार्यकर्ते संदीप पारस्वनाथ यांनी लोधा यांच्या दाव्याचा तीव्र निषेध करत "जैन हे हिंदू नाहीत" अशी स्पष्ट भूमिका मांडली आहे. लोधा यांनी एका मुलाखतीत जैन धर्म हा हिंदू संस्कृतीचा भाग असल्याचे सांगत, काँग्रेसने षडयंत्राद्वारे जैनांना हिंदूंपासून वेगळे केल्याचा आरोप केला होता. यावर प्रतिक्रिया देताना कार्यकर्त्यांनी म्हटले आहे की, ज्यांना स्वतःला हिंदू म्हणवून घ्यायचे आहे त्यांनी खुशाल जैन धर्म सोडावा, मात्र संपूर्ण समाजावर ही विचारधारा लादू नये. २०१४ मध्ये केंद्र सरकारने जैन समाजाला राष्ट्रीय स्तरावर अल्पसंख्याक दर्जा दिला होता, ज्यामुळे शैक्षणिक संस्था आणि शिष्यवृत्तींमध्ये समाजाला संरक्षण मिळते. स्वतः जैन असूनही लोधा यांनी घेतलेल्या या भूमिकेमुळे समाजमाध्यमांवर सध्या संमिश्र प्रतिक्रिया उमटत असून स्वतंत्र धार्मिक ओळखीच्या मुद्द्यावरून मोठी चर्चा रंगली आहे.
हे ही वाचा
0 Comments