बारामती विधानसभा मतदारसंघाच्या आगामी पोटनिवडणुकीसाठी सुनेत्राताई पवार या ६ एप्रिल रोजी आपला उमेदवारी अर्ज दाखल करणार आहेत. राष्ट्रवादी काँग्रेसचे नेते अजित पवार यांच्या निधनानंतर ही जागा रिक्त झाली असून, आता सुनेत्राताई पवार या निवडणुकीच्या रिंगणात उतरणार असल्याचे स्पष्ट झाले आहे. दरम्यान, त्यांच्या नुकत्याच झालेल्या दिल्ली दौऱ्याने राजकीय वर्तुळात मोठी खळबळ उडवून दिली आहे. गुरुवारी सुनेत्राताई पवार यांनी कोणाच्याही सोबतीशिवाय एकट्याने संसदेत हजेरी लावल्याने अनेकांच्या भुवया उंचावल्या आहेत. या दौऱ्याचे नेमके प्रयोजन काय होते आणि त्यांनी दिल्लीत कोणाच्या भेटीगाठी घेतल्या, याबाबत अद्याप कोणतीही अधिकृत माहिती समोर आलेली नाही, मात्र त्यांच्या या कृतीमुळे बारामतीसह राज्याच्या राजकारणात विविध चर्चांना उधाण आले आहे.
0 Comments