नवी दिल्ली
देशाची राजधानी दिल्लीमध्ये सध्या गॅस सिलिंडरच्या (LPG) पुरवठ्याबाबत मोठ्या समस्या निर्माण झाल्या आहेत. पुरवठा साखळीतील अडथळे आणि आंतरराष्ट्रीय बाजारातील इंधन दरांचा परिणाम यामुळे दिल्लीतील सर्वसामान्य नागरिकांसह परप्रांतीय मजुरांचे जगणे कठीण झाले आहे. एलपीजीच्या तुटवड्यामुळे हॉटेल आणि खानावळींचे दर वाढले असून, घरगुती वापरासाठीही गॅस मिळवणे कठीण झाले आहे. या वाढत्या खर्चामुळे आणि भविष्यातील अनिश्चिततेमुळे दिल्लीत रोजगारासाठी आलेल्या अनेक मजुरांनी पुन्हा आपल्या गावांकडे धाव घेतली आहे. बस स्थानकांवर आणि रेल्वे स्थानकांवर मजुरांची मोठी गर्दी पाहायला मिळत असून, "दिल्लीत राहणे आता परवडणारे नाही," अशी भावना मजूर व्यक्त करत आहेत.
हे ही वाचा
या स्थलांतरामुळे दिल्लीतील बांधकाम क्षेत्र आणि छोट्या उद्योगांवर मोठा परिणाम होण्याची शक्यता वर्तवली जात आहे. सरकारने जरी पुरवठा सुरळीत करण्याचे आश्वासन दिले असले, तरी जमिनीवरील परिस्थिती अद्यापही तणावपूर्ण आहे. इराण आणि मिडल ईस्टमध्ये सुरू असलेल्या युद्धामुळे कच्च्या तेलाच्या आणि गॅसच्या आयातीवर परिणाम होईल, या भीतीने साठेबाजी देखील वाढली आहे. केंद्र सरकारने नागरिकांना शांत राहण्याचे आवाहन केले असून, अफवांवर विश्वास न ठेवण्याचे सांगितले आहे. मात्र, गॅस एजन्सींच्या बाहेर लागलेल्या लांबच लांब रांगा ही प्रशासनापुढील मोठी डोकेदुखी ठरत आहे. जर हे स्थलांतर असेच सुरू राहिले, तर दिल्लीच्या अर्थव्यवस्थेला मजुरांच्या तुटवड्याचा मोठा फटका बसू शकतो.
0 Comments