मुंबई
'मुख्यमंत्री माझी लाडकी बहीण' योजनेचा लाभ घेणाऱ्या राज्यातील लाखो महिलांसाठी राज्य सरकारने एक अत्यंत महत्त्वाचा आणि दिलासादायक निर्णय घेतला आहे. ज्या लाभार्थी महिलांची ई-केवायसी प्रक्रिया अद्याप प्रलंबित आहे किंवा ज्यांच्या अर्जात काही तांत्रिक त्रुटी आहेत, त्यांना आता ३० एप्रिल २०२६ पर्यंत दुरुस्ती करण्यासाठी मुदतवाढ देण्यात आली आहे. महिला व बालविकास मंत्री आदिती तटकरे यांनी या निर्णयाची अधिकृत घोषणा केली. यापूर्वी ही प्रक्रिया पूर्ण करण्याची अंतिम तारीख ३१ मार्च २०२६ होती, परंतु आता महिलांना एक महिन्याचा अतिरिक्त कालावधी मिळाला आहे.
राज्यात अलीकडेच ओढवलेले अवकाळी पावसाचे संकट, गारपीट आणि अनेक महिलांनी केलेली विनंती लक्षात घेऊन सरकारने हा मुदतवाढीचा निर्णय घेतला आहे. मुख्यमंत्री देवेंद्र फडणवीस, उपमुख्यमंत्री एकनाथ शिंदे आणि उपमुख्यमंत्री सुनेत्रा अजित पवार यांच्या मार्गदर्शनाखाली हा बदल करण्यात आला आहे. तांत्रिक अडचणींमुळे किंवा माहिती चुकीची भरली गेल्यामुळे ज्या महिलांचे अर्ज अडकले आहेत, त्यांनी या संधीचा लाभ घ्यावा आणि ३० एप्रिलपर्यंत आपली ई-केवायसी प्रक्रिया पूर्ण करावी, असे आवाहन प्रशासनाकडून करण्यात आले आहे. या निर्णयामुळे कोणतीही पात्र महिला योजनेच्या लाभापासून वंचित राहणार नाही, याची खात्री दिली जात आहे.
0 Comments