गॅस टंचाईचं टेन्शन विसरा! अर्जेंटिनाने पाठवला हजारो टन LPG चा साठा

मध्यपूर्वेतील युद्धजन्य परिस्थितीमुळे निर्माण झालेल्या इंधन तुटवड्याच्या काळात अर्जेंटिना भारताचा खंबीर मित्र म्हणून समोर आला आहे. २०२६ च्या पहिल्या तीन महिन्यांत अर्जेंटिनाने भारताला तब्बल ५०,००० टन एलपीजीचा (LPG) पुरवठा केला असून, २०२५ मधील २२,००० टनांच्या तुलनेत हा आकडा दुपटीहून अधिक आहे. बाहिया ब्लँका बंदरातून नुकताच ११,००० टनांचा नवीन साठा भारताकडे रवाना झाला आहे. विशेष म्हणजे, २०२४ पूर्वी अर्जेंटिनाकडून भारताला एलपीजीची कोणतीही निर्यात होत नव्हती, मात्र आता हा दक्षिण अमेरिकन देश भारताच्या गॅस बाजारपेठेत आपले स्थान भक्कम करत आहे. अर्जेंटिना आपल्या प्रक्रिया प्रकल्पांची क्षमता वाढवत असून, आगामी काळात निर्यातीत मोठी वाढ होण्याची शक्यता आहे. दोन्ही देशांमधील द्विपक्षीय व्यापार ३६ टक्क्यांनी वाढून ६.३४ अब्ज डॉलर्सवर पोहोचला असून, अर्जेंटिना भारताला केवळ गॅसच नव्हे, तर सोयाबीन आणि सूर्यफूल तेलाचाही मोठा पुरवठादार बनला आहे.